主页 > I恵生活 >【轮证赢家】望住条保历加通道底先啦 >

【轮证赢家】望住条保历加通道底先啦

发布时间:2020-06-13   来源:I恵生活    
【轮证赢家】望住条保历加通道底先啦放大图片

一早起身我家老爷送咗首歌比我,係四大天王之一郭富城《爱的呼唤》,「哗~好sweet呀!」你以为,嗰只其实係坊间某位高人嘅二次创作改词歌曲,仲用埋郭富城腔调唱埋出嚟、剪好晒成个MV再放上网,老爷只係贪得意咁开心share,改词内容係乜?咪就係呢三个月喺香港最hit嗰单嘢啰。咁正嘅MV我当然再开心share比班老友啦。

噚日因为个市吽到发荒,所以无落到场,收市见恒指日线图呈「十字星」,其实都唔博佢会转势,事关本身得一粒「十字星」出现嘅话,佢力度唔係咁大,係需要其他技术指标配合,「转势」启示命中率先会相对地再高少少,但可惜噚日见其他技术指标走势各异,呢个亦都係唔想落场嘅原因(无方向嘛)。

依家9点47分,恒指今朝早开市先跌过百点,至依家已经跌257点,做紧26023点,暂时最低见过26019点。

呢啲位就更係开恒指牛熊证街货图睇咗先啦,下方牛证第一层26100至26199点已经死亡,呢度有相当于656张期指,而26000至26099点嗰617张期指都应该所剩无几,所以可以视25900至25999点为最贴价牛证层;而重货区就係25800至25899点,係呀,好近架咋,第二层咋,而呢度都有相当于961张期指。

至于上方熊证见到有两层新增街货层,分别係26700至26799点,同埋26800至26899点,分别有相当于359同35张期指;至于重货区就仍然係26900至26999点,呢度有1206张期指。量就多,但计最多新增街货层都真係最贴价嘅26700至26799点呢度,全数359张都係新增,反映大家都比较倾向开淡仓,唔睇好个市?

「恒指之前都六连跌啦喎,再加埋嚟紧又话国庆会维稳嘅?」咁亦都有可能阿爷见香港呢排咁曳,内地同胞又咁鬼爱国,维稳个A股就算呢;至于恒指六连跌呢单嘢就要睇今日个走势图啦,今日呢个图係战友Jack开心share,8月上旬至今恒指回升唔少,「上升通道」因而诞生,不过,喺呢条「上升通道」裏面,由9月中开始就出现咗一条细小嘅「下降通道」,截至噚日呢条「下降通道」已经触及「上升通道」嘅底,嚟到今日仲跌穿埋条「上升通道」,战友Jack就话target係24800点;但见保历加通道口收窄中,似乎暗示再比位大市下行嘅空间有限,再见到SlowSTC(14,3)%K线同%D线準备landing,恒指熊(56316),收回价26755点,全场最贴价熊证嘅其中一只,但都讲紧同个市有逾7XX点差距,但槓桿就最高,成交亦都活跃,拆恒指5分钟图见到呢个moment恒指穿26000点,同步SlowSTC(14,3)亦落到超卖位,等下一个超买位时先再入啦,目标睇住保历加通道底(25429点),或者够皮啰咪收割啰。

作者阿珊,任财经/投资版传媒人十几年,《钟摆战略赢港股》作者。用技术分析专心玩轮证,唔贪心,志在搵餐下午茶。

电邮:[email protected];FB:轮证赢家


上一篇: 下一篇: